Nýi miðbærinn á Selfossi opnaði um mitt ár 2021 og hefur fengið afar góðar viðtökur, jafnt hjá heimamönnum sem og gestum. Verkefninu er þó hvergi nærri lokið. Fyrsti áfanginn, rúmlega 5 þúsund fermetrar að stærð, er nú í fullum rekstri og framundan eru framkvæmdir í næsta áfanga, sem samtals telur rúmlega 25 þúsund fermetra. Þegar verkefninu lýkur verða í miðbænum fjölmargar og fjölbreyttar verslanir, veitingahús og vinnustaðir, um 80 íbúðir, allt að 150 hótelherbergi og ýmis afþreyingar- og þjónustustarfsemi.

Hugmyndafræðin í miðbæ Selfoss gengur út á að endurbyggja gömul hús, hvaðanæva af landinu, sem eiga það sameiginlegt að vera horfin af sjónarsviðinu, flest eftir að hafa orðið eldi að bráð. Þetta verða um 60 hús sem flest eru innblásin af íslenskum byggingarstíl og arkitektúr, þar sem litríkar timburklæðningar og bárujárn eru áberandi og allskyns smáatriðum í hönnun og arkitektúr gert hátt undir höfði.

Landsbyggð hefur lagt metnað í að byggja upp miðbæ Selfoss með virðingu fyrir bæði sögunni og fólkinu sem býr á svæðinu, að skapa að skapa líflegt umhverfi á mannlegum skala – stað þar sem fólki líður vel.